Editado no sentido de lectura do orixinal xaponés (de dereita a esquerda e de atrás cara adiante)

Ambientada nun futuro distópico no ano 2045, Emma é unha nena orfa de once anos que vive no orfanato Grace Field House, xunto a outros 37 nenos aos que considera os seus irmáns, e baixo a custodia dunha muller coñecida como «Nai». Os nenos dese hospicio viven felices e gozan dos mellores coidados ata que cumpren doce anos, momento no que teñen que marchar de alí. Por norma xeral visten uniformes brancos, teñen un número de recoñecemento tatuado no pescozo, e fan exames diarios nos que Emma sempre obtén a máxima puntuación xunto aos seus mellores amigos Norman e Ray. No seu tempo libre, os nenos poden facer o que queiran salvo achegarse a dous sitios: a entrada que comunica co exterior e o enreixado que delimita o bosque.
Unha noite, Emma e Norman infrinxen a norma de achegarse á entrada para devolverlle a Conny, unha nena recentemente adoptada, o coello de peluche que se esqueceu ao saír. Con todo, ao chegar alí descobren que Conny foi asasinada por uns demos e que «Nai» é en realidade unha criadora do gando humano; os monstros crían aos nenos en Grace Field House para poder comelos. Unha vez Emma e Norman asumen que foron enganados durante todo este tempo, unirán forzas con Ray para trazar un plan de fuxida que permita salvar a vida de todos os orfos.