Renoir ofrécenos algunhas das imaxes máis frescas e amables de toda a historia da arte: as diversións dominicais dun París despreocupado, as excursións polo Sena, os bailes populares, a emoción dunha velada na Ópera, a ledicia das nenas louras e o esplendor radiante de rapazas que asoman á vida. Coa súa arrebatada onda de cor e vitalidade, Renoir é un dos fundadores do impresionismo: ó gusto pola paisaxe de Monet e ó fino intelectualismo de Manet, Renoir contrapón a inesgotable curiosidade pola xente, pola acción, por calquera intre de existencia. Unha pintura sempre en movemento, nunca estática ou repetitiva; unha pincelada rica, plena, densa, para agasallarnos co raio resplandecente da ledicia.

3º-4º ESO

1º-2º BAC